يرجى الملاحظة أنه لا يوجد نشاط حديث لهذه المبادرة.

تحقيق حرية الفكر وتمكين الإبداع للمُهتمين بالمعرفة والتغيير والتعلم والبناء.

الرصيف إبتدى في شهر نوفمبر 2010 بمجلة بإسم خروجات وكان الهدف منها هو إننا نغير نوعية خروجاتنا بدل ما هي قهوة بس يبقى فيها نوع من الثقافة المُمتعة فكانت الفكرة إننا نُنشر جدول للحفلات الثقافية اللي بتتعمل في القاهرة وإن المجلة تتوزع ببلاش على الناس ويدفع قيمة طباعتها رعاة وفعلاً كان معانا موبينيل ومنصور .. إلى أن قامت الثورة في يناير 2011 وطلعت موبينيل ومنصور لعدم قُدرتهم على تحمل التكاليف بعد الخُسارة امادية اللي سببتهالهم الثورة.

على الرغم من خسارة الرعاة إلا إننا كسبنا كتير بسبب الثورة فإبتدى يبقى معانا عقول جديدة أضافت أفكار تنموية أعمق من "خروجات" فبقينا أكتر وأحسن. وإبتدت مجلة الرصيف في شهر مايو 2011 بتلات أبواب وبعدين إتطورت لـ 6 أبواب.

أبواب مجلة الرصيف:
جمهورية التحرير : هي حالة عيشناها لمدة 18 يوم في ميدان التحرير ماعيشناش زيهم قبل كده ولا بعد كده، شوفنا فيهم مصر اللي في
أحلامنا . حالة من التكاتف والحضارة والكرامة، بس مصر تحريرها مش ميدان ! التحرير ميدان في قلب كل واحد وواحدة فينا

شبكة وصل : في شباب كتير أوي في البلد دي اتجمعّوا علشان يعملوا حاجه كويسة لينا .. فكّرنا إننا نقابلهم ونتعرّف عليهم ونُنشر حكاياتهم .. يمكن حد يعجبه اللي بيعملوه فينزل يشارك معاهم أو حتى يفكر إنه يعمل حاجه بنفسه أو على الأقل نسكِّت الناس اللي بتقول إن البلد دي محدش بيعمل فيها حاجه كويسة ..تعال شوف أهُم ماليين البلد!

حواديت : حكايات من التاريخ يمكن نتعلم منه حاجه

مهارات : فكر كده شوية .. ! هتلاقي إن أكيد في حاجه نفسك تتعلمها من زمان بس ماجتش الفرصة إنك تتعلمها .. فريق الرصيف إتعرف على ناس مُبدعين كتير في مجالات مُختلفة ومش بس كده، دول كمان مُستعدين يعلموا مهاراتهم دي لناس تانيه .. إحنا جمّعنا الناس دي ونشرنا صورهم ومجالاتهم وإزاي تقدر توصلّهم علشان تتعلم الحاجه اللي نفسك فيها !

وصف مصر : أياً كان اللّي حصل أنا مش رد فعل..لأ، أنا مستقل..البلد دي ياما اتوصفت وياما اتحكت وكُل جيل له حكاياته اللي لازم يحكيها ويعرف حكاية بلده .. ولو ما عرفش حكاية بلده يبقي هايجي اللي يحكيله أكاذيب ويستغل جهله بيها .. أو يستغل جهله ويقنعه إنه لازم يقلده عشان يبقي روش زيه وبكده يفقده هويته ويخسر كل حاجة.
البلد دي اتوصفت قبل كده سنة 1802 على إيد فرنساويين تابعين للحملة الفرنسية على مصر، ووصف المُستعمِر هدفة الدراسة لمعرفة موارد الخير في البلد المُستعمرَة، أكيد ماكانتش خدمة للمُجتمع المصري .. إحنا قررنا نعمل وصف مصر جديد؛ وصف المصريين للمصريين .. لما نعرف بعض صعب نكره أو نخوّن بعض. وأكيد حنعيش أحسن ساعتها.

خروجات : لقينا إننا بس لو ابتدينا بشوية خروجات بسيطة ممكن نغير حاجات كتير أوي في حياتنا يعني بدل ما كُل ما يبقى عندنا وقت فاضي نروح نقعد عالقهوة لحد ما زهقنا من الكرسي اللي بنقعد عليه .. ابتدينا نغير ونروح أماكن تانيه ماكناش نعرف عنها حاجه لقينا ان الموضوع ده فعلاً بيفرق معانا جداً وبيعرفنا حاجات عن نفسنا ماكناش واخدين بالنا منها !

فضلنا نطبع مجلة الرصيف من شهر مايو 2011 لحد شهر ديسمبر 2012 تبرع بوقت وفلوس ناس مننا علشان الفكرة تستمر وتفيد أكبر قدر ممكن من الناس وماوقفناش طباعة إلا لما لاقينا وسائل بديلة ننشر بيها الفكرة.

أواخر السنة اللي فاتت 2012 عملنا مهرجانين في المعادي وشوفنا قد إيه في طاقة إيجابية عظيمة بتطلع لما الناس بتتجمع على حاجه إيجابيه .. المهرجان عبارة عن معرض للصناعات اليدوية اللي ناس زيي زيك عاملينها ومسرح كبير للفرق الفنية المستقلة ومنطقة مبادرات لعرض شغلهم ومنطقة أطفال.

بيت الرصيف فتح في شهر فبراير 2013 وهو مساحة حُرة مُستقلة إتبنت بأيادي مُجتمع مؤمن بإن القيمة والكرامة حق لكُل خلق الله

بيت الرصيف مفتوح علشان تعبر عن نفسك وتلاقي سبب وجودك وتنميه وسط ناس مؤمنين إن ربنا خلقك عشان تعيش أحسن حاجه جواك وتسعد بيها اللي حواليك .

أنشطة بيت الرصيف:

مسرح : علشان لو عندك حاجه تحب تقولها للناس أو تسمع منهم

ورش عمل : تتعلم فيها حاجه أو تعلم حد فيها حاجه

قعدة طبالي: لو عايز تفكر في حاجه وعايز النتيجة تطلع أصلية

المدورة : توقع وإنت قاعد عالترابيزة دي إن أي حد ممكن يجي يقعد معاك ويفتح كلام في أي موضوع وتتناقشوا فيه.

الناصبه : لو ريقك نشف وعايز تشرب حاجه تشفي روحك وتفوّق دماغك

المعرض : علشان تشتري حاجات مصرية حلوة معموله بإيدين ناس زيك