( يا ايها الشعب الحلو .. ازف اليكم خبر حلو وعشان احنا فى شهر حلو يبقى كله حلو فى حلو
تهنئ جمهورية سمكة شعبها بكافة اطيافه بشهر رمضان الكريم وتتمنى لكم صوما مقبولا وافطار شهيا
أما بعد ... فى اطار سعى الجمهورية لوحدة الصف ولم الشمل وعلى راى المثل اكلة هنية تكفى مية .. تدعوكم الجمهورية الى فطار جمهوري ملكي يوم الأحد 28 يوينو 2015 في درب 1718 .. الدعوة عامة وهتبقى لمة .. انتظروا مفجأة الفطار ..

أحنا هنعمل أكل كتير .. اللي قادر يجيب معاه اي طبق اكل من اي نوع من البيت هيبقي حلو اوي لأن اللي هتجبوه هيكمل السفرة من أكل او عصير وحلويات 

تقدر تقول لأصحابها يجوا يحضروا الفطار .. الهدف من الفطار هو اللمة مش الأكل .. ونرغي ونلعب وناكل ونتصور ونغمي ونرقص ونتجمع بدون أي مصالح .. 

الفطار ده بيتعمل للسنة التالتة علي التوالي بدأت الفكرة في 2013 وقت إعتصام وزارة الثقافة ودخل علينا رمضان والبلد كلها مكتئبة ومفيش أي أحداث فنية او ثقافية في أي حتة قررنا نجمع اللي بنحبهم واللي بيحبونا واللي عايزين ينبسطوا وأصحابنا اللي بيغنوا أو بيعزفوا عشان خاطر ننبسط وننغني ونرقص .. وسميته جمهورية سمكة نسبة لإسمي اللي سموه ليا أصحابي وأنا صغيرة وكنت بكرهوا جدا بس بعد شوية وقت بقينا كتير اوي وبقينا جمهورية :

أول سنة عملناه في مسرح روابط شكرا نهلة عصمت
ودي لينكات تقدروا تبصوا عليها :

- https://www.facebook.com/media/set/?set=a.573690036002704.1073741903.188587831179595&type=3

- https://www.facebook.com/notes/karoline-kamel/إفطار-مصري-في-جمهورية-سمكة/10151746730009510

- https://www.facebook.com/aly.moose/media_set?set=a.704462999569196.1073741851.100000165082757&type=3

- https://www.facebook.com/maha.turk/media_set?set=a.10151521525690778.1073741842.693595777&type=3

السنة التانية إستضفونا أل سعودي في سطوح بيتهم وكان إقتراح منة سعودي دام الله عزكم يا غالي ^_^

- https://www.facebook.com/aly.moose/media_set?set=a.944282998920527.1073741886.100000165082757&type=3

- https://www.youtube.com/watch?v=5OJlgkR7ZfY

- https://www.facebook.com/maha.turk/media_set?set=a.10152242803100778.1073741871.693595777&type=3


السنة دي بمساعدة جورج عبد الملاك ابن بار للجمهورية إننا نعمله في درب 1718 والمكان رحب بطريقة تدعوا للسعادة شكرا ريم حاتم .


عشان تبقي مواطن في الجمهورية وموجود في الفطار مطلوب منك : 
- تكون متفائل ومتعاون وبتحب ان الناس تكون مبسوطة.

بالنسب لفقرة الأكل :

- الناس اللي هتجيب أكل يبقي لطيف لو جيتوا بدري شوية عشان نظبط الدنيا 
- ياريت الأكل يبقي بنظام وعلي قد ما انت جعان وكمان بعد ما تخلص ما ترميش الطبق بتاعك في اي حتة في أماكن هتكون مخصصة لبوافي الأكل وأماكن تانية مخصصة للفوارغ من كوبيات وأطفاك وشوك ومعاليق .. ياريت نلتزم بده بس .. 

شكرا لكل هينورا الجمهورية مقدما ^_^

عنوان درب 1718 منقول من صفحة مهرجان مواوييل 

من منطقة مدينة نصر و مصر الجديدة والعباسية والمناطق المجاوره ننصح بطريق صلاح سالم – القلعة – كوبرى السيدة عائشه – هاتعدى الأشارة و بعدها تاخد أول ملف شمال – و بعدين تدخل يمين من عند محطة بنزين موبيل طريق الخياله و هاتمشى مع أنحراف الشارع يمين لحد ماتوصل مفترق لطريقين يمين وشمال ونخل في الجنينة اللي في النص، تاخد الطريق اليمين وحتمشي مع الطريق وتدخل اول شمال لحد ما حتلاقي درب ١٧١٨ في الوش بجوار مركز شباب الفسطاط.
--------
من منطقة الجيزة و وسط البلد يبقى المنيل شارع الروضه على طول – بعد نفق صلاح سالم تدخل أول يمين وبعد جامع عمرو ابن العاص تدخل مع الشارع اللي بيلف شمال وتدخل أول يمين وفي أخر الشارع في الوش حتلاقي مركز درب ١٧١٨ بجانب مركز شباب الفسطاط.
-------
من منطقة حلوان و المعادى يبقى طريق الكورنيش لحد أشارة الزهراء (عند بنزينة التعاون) هاتعديها و تدخل شمال و تطلع كوبرى العاشر اللى هاينزلك على طريق الخياله هاتاخد أول ملف وترجع تانى و تمشى لحد ماتوصل مفترق لطريقين يمين و شمال وسطهم جنينة وتاخد الطريق اليمين وحتمشي مع الطريق وتدخل اول شمال لحد ما حتلاقي درب ١٧١٨ في الوش بجوار مركز شباب الفسطاط.
-----
بالمترو: محطة مار جرجس 
هاتنزل الناحيه الشرقيه اللى فيها الكنيسه المعلقه – تنزل من المحطه تمشى يمين حوالى ٩٠ متر و بعدها شمال شارع قصر الشمع – تمشى فى الشارع على طول حوالى ٢٥٠ متر –حتلاقي مركز درب ١٧١٨ على يمينك بجوار مركز شباب الفسطاط